LeiÐalÝsing

Skátahreyfingin er uppeldishreyfing sem stefnir að því að hver skáti læri smám saman á þroskaferli sínum frá barnsaldri til fullorðinsára að vera sjálfstæður, virkur og ábyrgur og láta gott af sér leiða í samfélaginu. Skátastarf er óformlegt uppeldisstarf sem byggir á því að efla sjálfsnám ungs fólks með því að nýta tómstundir þess til uppbyggjandi verkefna.

Markmið skátahreyfingarinnar er að stuðla að uppeldi og þroska barna, unglinga og ungs fólks á þann veg að þeir einstaklingar sem „skátauppeldis” njóta verði sjálfstæðir og sjálfum sér nógir, en jafnframt virkir og ábyrgir samfélagsþegnar. – Samfélagsþegnar sem taka þátt í að bæta þann heim sem við búum í, náttúrulegt og menningarlegt umhverfi og samfélag manna, bæði það sem næst okkur er og á alþjóðavísu.

Skátafélagið Klakkur leggur áherslu á að bjóða upp á fjölbreytt starf, sem er aðlagað að aldri skátanna. Við höfum afnot af frábærri aðstöðu að Hömrum, útilífsmiðstöð skáta og erum gjarnan þar á haustin og vorin, en yfir vetrartímann erum við meira í skátaheimilinu okkar í Hyrnu. Í öllu skátastarfinu leggjum við mikla áherslu á útivist og vetrarskátun, hjá eldri skátunum, nýtum skálana okkar og förum reglulega í útilegur.